ဟော…. ဒီမှာ…. ဒီမိုကရေစီတွေရမယ်ဗျို့ …. ၀ယ်ကြဦးမလား

ဟော…. ဒီမှာ…. ဒီမိုကရေစီတွေရမယ်ဗျို့ …. ၀ယ်ကြဦးမလား (ထက်အောင်)

8:28 AM  သတင်းဆောင်းပါး  No comments

စာပေ၊ စာနယ်ဇင်းလောကအတွက်တော့ သမိုင်းတခေတ်ဖွင့်လှစ်လိုက်ပြီလို့ပဲဆိုရမလား…။ ဒါမှမဟုတ် အုပ်ချုပ်ရေးမဏ္ဍိုင်နဲ့ မီဒီယာမဏ္ဍိုင်တွေအကြားပဲ တဘက်နဲ့တဘက် အပြန်အလှန်တရားစွဲဆိုမှုတွေနဲ့ပဲ သမိုင်းသစ်တခုမှာ ရှေ့နေတွေ၊ တရားသူကြီးတွေပဲအလုပ်တွေဆက်ရှုပ်နေဦးမလားတော့ မပြောတတ်ဘူး။ စာနယ်ဇင်းကောင်စီ(ယာယီ)တော့ ဖွဲ့စည်းပြီးသွားပါပြီ….။ ပြန်ကြားရေးဝန်ကြီးအပြောင်းအလဲမှာပဲ ၀န်ကြီးအသစ်က ရုပ်ရှင်လောကသားတွေအပါအ၀င် စာနယ်ဇင်းသမားတွေနဲ့ ထင်သာမြင်သာရှိတဲ့ တွေ့ဆုံမှုတွေကိုလည်း ပြုလုပ်ပြီးတဲ့အကြောင်း ထွက်ရှိခဲ့ပြီးတဲ့ ဂျာနယ်တွေမှာ ဖတ်ခဲ့ရတော့ ငါတို့တတွေ တော့ စာပေကင်ပေတိုင်ဘ၀က လွတ်ပြီဟဲ့လို့ တကိုယ်တည်းကြွေးကြော်မိတယ်…။ သတင်းသမားတွေဘက် ကလည်း တာဝန်ခံမှုတွေကပိုရှိလာတယ်..။

ကျွန်တော်တို့နိုင်ငံဟာ ဆယ်စုနှစ်ပေါင်းများစွာက ဆာလောင်မွတ်သိပ်နေကြတဲ့ သတင်းလွတ်လပ်ခွင့်ဟာ ဒီကနေ့ ဒီမိုကရေစီအသွင်ကူးပြောင်းနေဆဲကာလတစ်ခုမှာ သတင်းမီဒီယာမဏ္ဍိင်အတွက် ရုတ်ချည်းဆိုသလို ပြောင်းလဲလာတဲ့ အပြောင်းအလဲတခုကိုတော့ လက်ခံရမှာပဲ…။

(တချို့မှောင်နေသေးတဲ့ နေရာတွေက လွဲရင်ပေါ့….။) သတင်းသမားဆိုတာကလည်း ခေတ်အဆက်ဆက်မှာ အစိုးရ၊ နိုင်ငံရေးပါတီနဲ့ အခြားအဖွဲ့အစည်းတွေ၊ နောက် စီးပွားရေးသမားတွေရဲ့ လက်ကိုင်တုတ်မဖြစ်ရဘူးလို့ အခြေခံ ကျင့်ဝတ်တွေ ထဲမှာ ပါပြီးဖြစ်လောက်တယ်..။ ပြည်သူလူထုကိုပဲ တသက်လုံးမျက်နှာမူရပါမယ်တဲ့…။ အချို့ကလည်း အစိုးရမကောင်းကြောင်းချည်းပဲ ဆက်တိုက်ပြောလာခဲ့ကြတယ်…။ ကောင်းတာလုပ်ရင် ကောင်းတယ်လို့ပြောဖို့ ၀န်လေးကြတယ်…။ မိမိရဲ့စာကို ဖတ်နေတဲ့သူတွေ လျော့သွားမှာ၊ မိမိက အစိုးရကောင်းတာကို ကောင်းတယ်လို့ပြောရင် မိမိကို အထင်သေးမှာ တွေကို စိုးရွံ့တတ်ကြတယ်..။ အစိုးရကို များများမကောင်းပြောပေးတဲ့ ဆောင်းပါးရှင်ကိုမှ အားပေးတတ်ကြ တယ်။ တနည်းအားဖြင့်တော့ အချို့လူငယ်နိုင်ငံရေးဆောင်းပါးတွေ၊ သတင်းတွေ ရေးသားတဲ့ လူငယ်တွေ အတွက် ၀မ်းသာစရာကိစ္စမဟုတ်ဘူး။

စစ်အာဏာရှင်အစိုးရလက်ထက်မှာတော့ သတင်းသမားတွေ၊ သတင်းစာသမားတွေကို နည်းအမျိုးမျိုးနဲ့ နှိပ်ကွပ်ခဲ့ကြတော့ အခုဆိုရင် တချို့ကဒေါင်းအိုကြီးတွေဖြစ်လို့၊ တချို့ဆိုရင်ဒေါင်းပျိုတွေရဲ့ အခန်းကဏ္ဍကို ၀င်ပြီးစွက်လားဖက်လားလုပ်ချင်တဲ့ စိတ်ကမပျောက်ချင်သေးဘူး…။ အတွေးအခေါ်တွေ အကန့်သတ်ခံထားရ တဲ့အခါမှာ လွတ်လပ်စွာမတွေးခေါ်ခဲ့ကြဘူး..။ မိမိရဲ့ထင်မြင်ယူဆချက်တွေကို လွတ်လပ်စွာ ထုတ်ဖော် ရေးသား၊ ဖြန့်ဝေခွင့်မရခဲ့ကြတဲ့အခါမှာ အတွေးအခေါ်တွေကမှိုတက်၊ ထုတ်ဝေခွင့်ရတဲ့စာတွေအပေါ်မှာသာ မှီခိုပြီးတော့ ဖတ်မှတ်၊လေ့လာပြီး တဆင့်ပြန်ရေးရတဲ့အခါမှာ လူငယ်တွေအတွက် အခွင့်အရေးတွေတချို့ ဆုံးရှုံးခဲ့ရပါတယ်..။ ဒီကနေ့မှာတော့ ထွက်လာလိုက်တဲ့ သမိုင်းတွေ၊ ထွက်လာလိုက်တဲ့ နိုင်ငံရေးဆောင်းပါး တွေ၊ ထွက်လာလိုက်တဲ့ နိုင်ငံရေးသဘောတရား၊ အယူအဆတွေ၊ ဖတ်မနိုင်၊ မှတ်မနိုင်ဖြစ်နေရတာကလဲ နိုင်ငံရေးသေနေတဲ့၊ ဝေးနေတဲ့ ကျွန်တော်တို့မျိုးဆက်တွေအတွက် အကောင်းလား၊ အဆိုးလားတောင် မဆန်းစစ်တတ်တော့ဘူး..။ ကျွန်တော့်မှာဆို ဖတ်စရာတွေအခန်းထဲမှာ အုပ် (၂၀) လောက်ရှိတယ်..။  ဒီမိုကရေစီတွေ မနိုင်မနင်းများဖြစ်နေသလားလို့…..။ နေ့စဉ်ထုတ်သတင်းအသားပေးနဲ့ နိုင်ငံရေးဆောင်းပါးတွေ၊ ဥပဒေသဘောတရားတွေကိုတော့ အလျဉ်မီအောင်လိုက်ဖတ်နေရတယ်…။

မနေ့ကပဲ အပြည်ပြည်ဆိုင်ရာကမ္ဘာ့ငြိမ်းချမ်းရေးနေ့ကြီးကတော့ စီတန်းလမ်းလျှောက်ဆန္ဒဖော်ထုတ်ပွဲတွေ၊ အခမ်းအနားတွေနဲ့ ရန်ကုန်၊ မန္တလေးနဲ့ အခြားနယ်မြို့တွေမှာတော့ စည်ကားသိုက်မြိုက်စွာ ကျင်းပပြီးစီးခဲ့ကြ တယ်။ မနေ့ညက အင်တာနက်သတင်းတွေအရတော့ ခွင့်ပြုချက်မရပဲပြုလုပ်ခဲ့ကြသူတွေ ဦးဆောင်တဲ့သူတွေ ကို ဥပဒေအရအရေးယူသွားမယ်ဆိုတာကို ရန်ကုန်တိုင်းဒေသကြီးအစိုးရအဖွဲ့က ရဲမှူးတယောက်က သတင်းစာရှင်းလင်းပွဲမှာပြောသွားပါတယ်….။ အခြားမြို့ကြီးတွေမှာတော့ ငြိမ်ငြိမ်သက်သက်ပဲလို့ သိရတယ်…။ ဓာတ်ပုံတွေအောက်က comment တွေမှာတော့ မတူကွဲပြားတဲ့အမြင်တွေတွေ့ရတယ်…။ တချို့ကတော့ စည်ပင်ဥပဒေကိုပြောကြတယ်..။ ဥပဒေနဲ့မညီတဲ့အလုပ်တွေကိုလုပ်တယ်လို့ပြောကြတယ်..။ တချို့ကလည်း တကယ်ဆိုရင် အမှန်တကယ်တိုက်ပွဲဖြစ်နေတဲ့နေရာမှာ သွားပြီးလုပ်ကြဖို့ပြောတယ်…။ တချို့ တက္ကစီသမား တွေကတော့ လမ်းကြောတွေပိတ်လို့ ပတ်မောင်းလိုက်ရတာ အချိန်ကုန်၊ဆီကုန်ဖြစ်ကြတယ်တဲ့…။ တချို့ကြတော့လည်း ဒီလိုဆန္ဒဖော်ထုတ်တာကို ခွင့်ပြုမိန့်ဘာလို့မပေးရတာလဲ။ မပေးတဲ့အပြင် ဖမ်းဆီးမှုတွေ ကိုဘာကြောင့်လုပ်ရတာလဲ…။ တချို့ကျတော့လဲ ပြည်သူလူထုတရပ်လုံးမပါဝင်လာတာကို အကြောင်းပြပြီး သန်း ၆၀ ကျော်တဲ့ ပြည်သူလူထုကြီးက ငြိမ်းချမ်းရေးမလိုချင်တော့သယောင်ပြောနေဆိုနေကြတယ်…။

ဒီနေရာမှာ ကျွန်တော့်တစ်ဦးတည်းအမြင်ကိုချပြရရင်တော့ စီတန်းလှည့်လည်ဆန္ဒပြတဲ့ နည်းဥပဒေဟာ တရားမမျှတဘူးဆိုရင် အဲဒီဥပဒေကိုပြင်ဆင်၊ပြောင်းလဲ၊ပြဋ္ဌာန်းပေးဖို့ အရင်ဆုံးတောင်းဆိုရမယ်…။ တဘက်သတ်ရေးဆွဲထားတဲ့ဥပဒေဖြစ်နေရင် တရားမျှတတဲ့ဥပဒေဖြစ်အောင် အရင်ပြုလုပ်ရမယ်…။ အခုတော့ နိုင်ငံရေးတက်ကြွလှုပ်ရှားသူတွေ၊ နိုင်ငံရေးပါတီတွေ၊ အရပ်ဘက်လူ့အဖွဲ့အစည်းတွေ၊ ပရဟိတအဖွဲ့တွေ၊ ငြိမ်းချမ်းရေးကွန်ယက်လှုပ်ရှားသူတွေ၊ ဌာနဆိုင်ရာဝန်ထမ်းတွေနဲ့ ပြည်သူတွေကြားမှာ သိသိသာသာကြီးအမြင် ကွဲပြားသွားကြတာပဲလို့ သုံးသပ်မိတယ်…။ သေနတ်သံတွေကြားထဲမှာ ခွပ်ဒေါင်းအလံတော်ကိုရဲရဲကိုင်ပြီး ဒီမိုကရေစီရမှအမျှဝေပါလို့ ပြောဆိုသွားတဲ့ အာဇာနည်ကျောင်းသားရဲဘော်တွေရှိခဲ့ရင်တော့ ဘယ်လိုဝေဖန် သုံးသပ်ကြမလဲလို့ တွေးမိပါတယ်…။ (ကျွန်တော်တဦးတည်းအမြင်ပါ)

ဆန္ဒဖော်ထုတ်တာနဲ့ပက်သက်ပြီး မိတ်ဆွေတယောက်ကပြောပြတာကို ပြန်ပြောပြရရင် သူက ကုမ္ပဏီတခုက ကားဝယ်တယ်။ သူ့ကို ဓာတ်ပုံပြပြီး ရောင်းတယ်..။ တကယ်လည်းကားလည်းရောက်လာရော ဓာတ်ပုံထဲက ပါတဲ့ဟာတွေ တချို့ကပါမလာဘူး..။ သူက ကားကုမ္ပဏီကိုမကျေနပ်ဘူး..။ ဆန္ဒဖော်ထုတ်ချင်တယ်.။ သူတယောက်တည်း အဲဒီကားကုမ္ပဏီရှေ့မှာ (၂) နာရီလောက် တရက်တည်းဆန္ဒဖော်ထုတ်ချင်တော့ သက်ဆိုင်ရာရဲစခန်းမှာ ဆန္ဒပြခွင့်လျှောက်ထားတယ်..။ တာဝန်ရှိသူကမေးပါတယ်..။ ဘာကြောင့်လဲဆိုတော့ သူတို့က လုံခြုံရေးကိုစီစဉ်ပေးရမယ်တဲ့။ မပေးလို့မရပါဘူး..။ ပြည်သူကဆန္ဒဖော်ထုတ်ချင်ရင် ပေးကိုပေးရပါ မယ်လို့ ရှင်းပြတယ်…။ အကျိုးအကြောင်းကိုသိတော့ ကားကုမ္ပဏီနဲ့ကားဝယ်သူကို နှစ်ဦးနှစ်ဘက်တွေ့ဆုံစေ ပြီးညှိနှိုင်းဖြေရှင်းပေးလိုက်တာ အဆင်ပြေသွားတယ်လို့သိရတယ်…။ ဒါကိုသုံးသပ်ကြည့်ခြင်းအားဖြင့် နည်းဥပဒေအရ ပေးကိုပေးရမယ်…။ မလိုအပ်ပဲ ဆန္ဒဖော်ထုတ်တာကို မလုပ်စေချင်ဘူး..။ ကျွန်တော်တို့ လူမျိုးတွေများဆန္ဒပြတာကို တကယ့်ဒီမိုကရေစီအစစ်ကြီးလို့ ထင်နေပုံရတယ်လို့ တွေးမိတယ်..။ လုပ်ရပ်တိုင်း မှာ ရလဒ်တခုခုတော့ ရကိုရရမယ်…။

မုံရွာကြေးနီတောင်ကြီးကတော့ လိုအပ်တယ်..။ သဘာဝပတ်ဝန်းကျင်ရှုထောင့်၊ လယ်တီဆရာတော်ဘုရားကြီး သီတင်းသုံးခဲ့တဲ့နေရာကြီး၊ ကျွန်တော်တို့ ထိန်းသိမ်းရမယ်..။ ဒါကလိုအပ်တယ်…။ အဲဒီမှာစစ်ကိုင်းတိုင်းဒေသ ကြီးအစိုးရအဖွဲ့ရဲ့ သက်ဆိုင်ရာနယ်မြေက မြို့နယ်မှူးကတော့ သူ့လုပ်ခဲ့တဲ့ဒဏ်ကိုသူပြန်ခံရမယ်…။ သေချာတာတခုတော့ရှိတယ်….။ ကျွန်တော်သိတဲ့ဒီမိုကရေစီဆိုတာ ဆန္ဒပြပွဲတွေခဏခဏဖြစ်နေတာတော့ မဟုတ်လောက်ပါဘူး….။

ပြီးခဲ့တဲ့တပတ်ကပဲ ထူးခြားသတင်းတပုဒ်ရတယ်..။ လွှတ်တော်ကိုယ်စားလှယ်တယောက်ရဲ့ (RUBY DRAGON COMPANIES ပိုင်ရှင်) တရားမမျှတမှု၊ ၀န်ထမ်းတယောက်အပေါ်မှာ တရားမဲ့ဆုံးဖြတ်မှုကို နားနဲ့ဆတ်ဆတ် ကြားလိုက်ရတယ်..။ ဖြစ်ပုံက ရုံးအဖွဲ့မှူးကခိုင်းတာကို ၀န်ထမ်းကအချိန်မတော်အထိ လုပ်ပေးပါတယ်..။ နောက်တရက်ကျတော့ သက်ဆိုင်ရာဌာနက မန်နေဂျာက သူ့ကိုမပြောလို့ဆိုပြီး သူဋ္ဌေးလွှတ်တော်အမတ်ကြီး ကို ချွန်တယ်ပေါ့ဗျာ…။ ၀န်ထမ်းနဲ့ရုံးအဖွဲ့မှူးကမှန်ကန်နေပါလျှက်နဲ့ အဖြစ်အပျက်ကိုသေချာမစုံစမ်းပဲနဲ့ ၀န်ထမ်းကို ချက်ချင်းအလုပ်ထုတ်လိုက်ပါတယ်..။ ပထမတော့ အလုပ်ရှင်အလုပ်သမားကိစ္စက ကိုယ်နဲ့မဆိုင် ဘူးလေလို့နေမလို့ပါပဲ…။ တရုံးလုံးမှာက အမှန်တရားပျောက်ဆုံးနေတဲ့သဘောကိုပါ စုံစမ်းသိရှိရတယ်..။ ကျွန်တော်တို့လူမျိုးတွေကို မက်မောလောက်တဲ့ငွေကြေးကိုပေးထားပြီး ငွေကြေးအားကိုးနဲ့ တရားမျှတမှုကို မျက်ကွယ်ပြုထားတဲ့သူကိုယ်တိုင်က လွှတ်တော်အမတ်တယောက်ဖြစ်နေတယ်ဆိုတော့ ကျွန်တော် တော်တော်လေးကိုစိုးရိမ်သွားတယ်…။ သူက ပအို့ဝ်လူမျိုးတယောက်ပါဖြစ်နေပါတယ်တဲ့..။ ခုလိုအမျိုးသား သွေးစည်းညီညွှတ်ရေးတည်ဆောက်နေတဲ့ကာလမှာ အလုပ်ရှင်၊အလုပ်သမားပြဿနာက တိုင်းရင်းသားတွေ စည်းလုံးညီညွှတ်မှုအထိ ထိခိုက်သွားနိုင်တယ်..။ နောက်တခုက ဥပဒေပြုမဏ္ဍိုင်က အမတ်တယောက်ဖြစ်နေ တော့ တိုင်းပြည်အရေးကိုတွေးမိလို့ စိတ်လေးတယ်..။ လွှတ်တော်ဥက္ကဋ္ဌကြီးသိမှသိပါလေစ၊ နောက်တခုက လွှတ်တော်ရဲ့ဂုဏ်သရေကို ဘယ်လောက်တောင်ထိခိုက်နိုင်တယ်ဆိုတာ တွေးမိပါလေစ၊ မိမိရဲ့ဝန်ထမ်းကို အပြစ်မရှိပဲနဲ့ တရားမဲ့အလုပ်ထုတ်ပစ်တယ်ဆိုရင် အဲဒီ့အမတ်ရဲ့ဒေသက ပြည်သူလူထုတွေအပေါ်မှာကော အမတ်ကြီးဘယ်လိုသဘောထားမလဲဆိုတာ မေးကြည့်ချင်တယ်…။ အမတ်ဘယ်လိုဖြစ်လာသလဲဆိုတာလဲ မေးခွန်းထုတ်စရာပါပဲ…။ အလုပ်ထုတ်ခံရတဲ့ဝန်ထမ်းဘက်ကကြည့်မယ် ဆိုရင် အပြစ်မရှိဘူး၊ နစ်နာကြေးမပေးဘူး။ အလုပ်တခုကို ချက်ချင်းရှာဖို့ခက်ခဲနေတဲ့အတွက် နင်းပြားလူတန်း စားဘ၀တွေအတွက်တော့ အလုပ်သမားအခွင့်အရေးချိုးဖောက်ခံရတာပါပဲ…။ စိတ်ဝင်စားရင်တော့ သတင်းဂျာနယ်တွေကို လက်တို့လိုက်ချင်ပါရဲ့….။

တနေ့ကတော့အစ်ကိုတော်တွေနဲ့အတူ ပုသိမ်ရေဘေးကယ်ဆယ်ရေးကိုလိုက်သွားဖြစ်တယ်…။ ရန်ကုန်-ပုသိမ် ကားလမ်းတလျှောက်မှာ လမ်းမပေါ်ရေကြီးနေတဲ့နေရာတွေကို တွေ့ခဲ့ပါတယ်..။ ရေကတော့ကျသွားပြီ ဒါပေမယ့် နောက်ဆက်တွဲပြဿနာတွေအများကြီးကို တွေ့ခဲ့၊မြင်ခဲ့၊ကြားခဲ့ရတယ်…။ မီဒီယာတွေပွင့်လင်းလာတဲ့ အခါမှာ ရပ်ကျေးအုပ်ချုပ်ရေးမှူးတွေရဲ့ ပြည်သူတွေကိုမတရားလုပ်တာတွေကို မြို့ကိုယ်စားပြုလူငယ်သတင်း ထောက်တွေကတဆင့် လူမှုကွန်ယက်တွေရဲ့ စာမျက်နှာတွေထက်မှာ နေ့စဉ်နဲ့အမျှမြင်တွေ့လာနေရတယ်..။ ပြန်လာတဲ့လမ်းတလျှောက်မှာတော့ ဧရာဝတီတိုင်းဒေသကြီး၊ ကျောင်းကုန်းမြို့နယ်၊ ရင်ဆိုင်ကျေးရွာမှာ ရင်ဆိုင်နေရတဲ့ ဒုက္ခတွေကို ရွာသူရွာသားများမှတဆင့်သိခဲ့ရတယ်…။ ကျွန်တော်တို့နဲ့အတူ Sky Net က သတင်းထောက်လေးတယောက်ပါလာပါတယ်…။ ရွာသူရွာသားတွေခင်ဗျာမှာ ဘယ်လောက်အထိ ဖိနှိပ်ခံနေရ သလဲဆိုရင် ကျွန်တော်တို့တစ်တွေကားပေါ်ကဆင်းလာတာမြင်တော့ မျက်နှာတွေက တော်တော်လေးကို ပြုံးရွှင်နေကြတယ်….။ သူတို့ခံစားနေရတဲ့ဒုက္ခတွေကို အလုအယက်ပြောပြကြတယ်…။ နိုင်ငံတော်သမ္မတကြီး က လယ်/ဆည်ကတဆင့် မျိုးစပါးတွေကို တဧက (၁) တင်းပေးဖို့သတ်မှတ်ထားတယ်..။ မြှုပ်ပျက်လို့ခေါ်တဲ့ လယ်တွေက (ရေမြုပ်လို့ပျက်သွားတဲ့လယ်ပေါ့) ဧက (၂၀၀) လောက်ရှိတာကို ရပ်ကွက်အုပ်ချုပ်ရေးမှူးက ဧက (၇၀၀) စာတောင်းတဲ့ကိစ္စတွေကိုပါသိခဲ့ရတယ်…။ ကိုယ့်အတ္တကိုရှေ့တန်းတင် ရေမြောင်းတွေကိုပိတ်ထားတော့ အနိမ့်ပိုင်းကျတဲ့ရွာတွေဟာ (၁)လနီးပါးလောက် ရေတောထဲမှာနေခဲ့ရတယ်..။ ကျောင်းကုန်းဆိုတာ ရန်ကုန်နဲ့ သိပ်မဝေးပေမဲ့ မီဒီယာတွေနဲ့အလှမ်းဝေးနေတော့ ဒီလိုတရားမဲ့မှုတွေကို တပြည်လုံးအတိုင်းအတာ မသိနိုင်ဘူး..။ ကျွန်တော်လဲ အစ်ကိုတော်ကို မေးခွန်းထုတ်မိတယ်..။ အစ်ကို ကျောင်းကုန်းမှာ ပြည်သူ့လွှတ်တော် ကိုယ်စားလှယ်မရှိဘူးလားပေါ့…။ ဒါတွေကို သူမသိဘူးလားလို့မေးမိတယ်..။  သူကပြောတယ်…။ အလုပ်မလုပ်လို့ပေါ့ ညီလေးရာတဲ့…။ နောက်ထပ်ဒုက္ခတွေရှိနေပေမယ့် စာရှည်မှာစိုးလို့ မရေးတော့ပါဘူး….။

ဖဆပလခေတ်က အဘတယောက်ကပြောဘူးတယ်…။ နိုင်ငံရေးသမားတွေအာဏာလုနေလို့ နေ၀င်းကြီးက ကောက်စားသွားတာပါတဲ့….။ ခုလက်ရှိအခြေအနေမှာကော နိုင်ငံရေးသမားတွေ အာဏာလုနေတယ်၊ မလုနေဘူးဆိုတာလေးကို သတင်းတွေနဲ့ကိုယ်တွေ့ကို အခြေခံပြီးပြောရရင် ဒီရက်ပိုင်းတွေမှာ ၈၈ အရေးတော် ပုံကြီးတလျှောက် တခန်းတကဏ္ဍကနေ အုတ်တချပ်၊ သဲတပွင့်အဖြစ် ပါဝင်ကပြအသုံးတော်ခံခဲ့ကြတဲ့ ဒီမိုကရေစီအရေးလှုပ်ရှားခဲ့ကြတဲ့သူတွေနဲ့ တော်တော်လေးကိုဆုံဖြစ်တယ်…။ သူတို့ဖြတ်သန်းခဲ့ရတဲ့ သမိုင်း တွေကိုလည်း သူတို့တွေကမြိန်ရေယှက်ရေပြောပြကြတယ်…။ နောက်ဆုံးတော့ အစုအဖွဲ့တခုမှာ အားလုံးအတူ တကွပူးပေါင်းဆောင်ရွက်ကြမယ်ဆိုရင် ဒီမိုကရေစီအင်အားစုတွေ အင်အားကြီးမားလာမှာအမှန်ပါပဲ..။ အခုတော့ အင်အားတွေက တစစီပြန့်ကျဲနေတယ်..။ နောက်တခုက ကိုယ်တိုင်လဲလုပ်ကိုင်ဆောင်ရွက်နိုင်မှု အားနည်းပြီး သူတပါးလုပ်ကိုင်ဆောင်ရွက်နေတာတွေကို အပြုသဘောမဝေဖန်မထောက်ပြပဲနဲ့ အပျက်သဘော တွေကို တွေ့တွေ့လာရတယ်..။ ဒီမိုကရေစီအင်အားစုတွေအချင်းချင်း ခွက်စောင်းခုတ်နေကြတယ်..။ ဒီမိုကရေစီလို့အော်အော်နေပြီးတော့ အာဏာရှင်စရိုက်တွေလွှမ်းမိုးနေတယ်…။ မိမိသာလျှင် ဒီမိုကရေစီစစ်စစ် အဖြစ်တယ်လို့ ထင်နေကြတယ်…။ ပြည်သူလူထုအတွက် ကိုယ်ကျိုးမဖက်ပဲ အမှန်တကယ်အလုပ်လုပ်မယ့် ကွန်ယက်တွေ၊ အရပ်ဘက်လူ့အဖွဲ့အစည်းတွေများများ ပေါ်ပေါက်လာတာကောင်းပါတယ်…။ လုပ်နည်းကိုင် နည်းတချို့တော့ လွဲချော်နေသေးတယ်…။

အာဏာရှင်တွေကပူးပေါင်းဆောင်ရွက်မှုအားကောင်းတယ်..။ ဒီမိုကရေစီဘက်တော်သားတွေကျတော့ ပူးပေါင်းဆောင်ရွက်မှုအားနည်းပါတယ်…။ တယောက်နဲ့တယောက် အပြစ်ပြောဖို့ဝန်မလေးကြဘူး…။ တော်တော်လဲ တရားကျဖို့ကောင်းတဲ့သူတွေပါပဲ….။

မီဒီယာတွေကောကြည့်ဦးမလား…။ အချို့ဆိုကိုယ်သွားပြီးအင်တာဗျူးလုပ်ရမည့်သူက ဘယ်သူမှန်းမသိ၊ ဘာကောင်မှန်းမသိ၊ ဘာတွေမေးမှန်းလဲမသိ၊ အဆင့်အတန်းတွေမြှင့်ဖို့လိုနေပါသေးတယ်…။ ဂျာနယ်တိုက်တွေ အနေနဲ့မိမိရဲ့ သတင်းထောက်တွေကို အခြေခံဂျာနယ်လစ်သင်တန်းလေးလောက်တော့ အလကား သင်ပေးဖို့ကောင်းတယ်…။ ပွင့်လင်းလာတဲ့ခေတ်မှာ မီဒီယာတွေပေါက်ကရလုပ်ရင် လုပ်တဲ့သူက ခံရမှာပဲ…။ ဓာတ်ပုံလေးတစ်ပုံနဲ့ ဓာတ်ပုံထဲမှာပါတဲ့အကြောင်းအရာလေးလောက် ရေးနိုင်၊သားနိုင်တာကို ကိုယ့်ကိုယ်ကိုယ် သတင်းသမားလို့ထင်မနေနဲ့..။ အနာဂတ်မှာဖြစ်လာနိုင်တဲ့  စီမံကိန်းတွေရဲ့ ကောင်းကျိုး၊ ဆိုးကျိုးတွေကို ပြည်သူလူထုကိုကော၊ အစိုးရကိုကော ပြတ်ပြတ်သားသား ဝေဖန်ထောက်ပြရမယ်…။ ဒါမှ လူထုအပေါ် တာဝန်ကျေမယ်….။ ခုတော့ ရာခိုင်နှုန်းတော်တော်များများက တရက်ကို သတင်းလေးတပုဒ်လောက်ရရင် တာဝန်ကျေပြီလို့ သတ်မှတ်ကြတယ်….။ လွတ်လပ်တဲ့၊ အမှီအခိုကင်းတဲ့ ပြည်သူ့အတွက် သတင်းသမားတွေ များများလိုအပ်တယ်…။

ခုလိုအချိန်မှာ သေသွားတဲ့သူတွေကို လွမ်းဆွတ်တမ်းတကြေကွဲယုံနဲ့ အလုပ်တွေကမပြီးဘူး။ သူတို့ပြောခဲ့သလို လုပ်ဖို့၊ သူတို့လုပ်ခဲ့သလိုလုပ်ဖို့ပဲလိုအပ်တယ်..။ တိုင်းပြည်ရဲ့ကဏ္ဍအသီးသီးကို ပုံဖော်နေကြတဲ့သူတွေ ကိုယ်တိုင် ပြုပြင်ပြောင်းလဲချင်တဲ့စိတ်၊ ရိုးသားတဲ့စိတ်နဲ့သာ တည်ဆောက်ဖို့လိုတယ်…။

နောက်ဆုံးအနေနဲ့ ဒီမိုကရေစီဘက်တော်သားတွေရဲ့ ခွက်စောင်းခုတ်ချင်တဲ့စိတ်တွေ၊ အကျင့်စာရိတ္တ မကောင်းတဲ့လွှတ်တော်အမတ်တွေ၊ နောက်ကြောင်းပြန်လှည့်ချင်သူတွေ၊ ပြန်လှည့်ဖို့ကြိုးစားနေသူတွေ၊ မီဒီယာသမားတွေ၊ စာရိတ္တမကောင်းခဲ့တဲ့ ပြည်တော်ပြန်တွေ ကျပ်ကျပ်သတိထားပါ…။ ပေါက်ကရလုပ်ရင် ပြည်သူလူထုဒဏ်ခတ်တာကို ပြန်ခံရလိမ့်မယ်။

(ကျွန်တော်စာမရေးတာကြာသွားတဲ့အတွက် ခွင့်လွှတ်ကြစေချင်ပါတယ်…။ စာတွေရေးတာတွေ များလာတဲ့ အခါ တာဝန်ခံမှုပါ ပါလာတဲ့အတွက် အရင်လိုခပ်စိပ်စိပ် မရေးနိုင်တော့တာပါ…။ ကျွန်တော့်ရဲ့ မိတ်ဆွေ၊ သူငယ်ချင်း၊ ညီအစ်ကိုမောင်နှမတွေရဲ့ သွန်သင်၊ လမ်းညွှန်မှုတွေအတိုင်း ကိုယ်ယုံကြည့်တဲ့လမ်း၊ ကိုယ်ယုံကြည်တဲ့အလုပ်တွေကို ဆက်လက်လုပ်ဆောင်သွားပါမယ်..။ မည်သည့်ပါတီ၊ မည်သည့်အဖွဲ့အစည်း ရဲ့ သြဇာခံ၊ လက်ကိုင်တုတ် မဖြစ်ရအောင် ကြိုးစားနေထိုင်သွားပါမယ်..။ အားလုံး စိတ်ချမ်းသာ၊ ကိုယ်ကျန်းမာ ရှိပါစေ…။)

လေးစားစွာဖြင့်

ထက်အောင် (၂၀၁၂၊ စက်တင်ဘာ၊ ၂၂)