သင်္ကြန်ကာလအတွင်း ၂၆ ဦးသေ၊ ၁၈၀ ကျော် ဒဏ်ရာရ

ကျော်ခ| April 18, 2013 | Hits:3,841

  

ရန်ကုန်မြို့ ကန်တော်ကြီး ပတ်လမ်းတွင် သင်္ကြန် အကြတ်နေ့ ညနေပိုင်းက မူးယစ် သောင်းကျန်းသူ တဦးကို ရဲများက ထိန်းသိမ်းနေစဉ် (ဓာတ်ပုံ – ဂျေပိုင် / ဧရာဝတီ)

မြန်မာ့ရိုးရာ အတာသင်္ကြန်ကာလ နိုင်ငံတဝန်းလုံးတွင် အကြိုနေ့မှ အတက်နေ့အထိ ၄ ရက်အတွင်း အမှု စုစုပေါင်း ၁၉၈ မှု ဖြစ်ပွားခဲ့ပြီး ၂၆ ဦး သေဆုံးကာ ၁၈၅ ဦး ဒဏ်ရာ ရရှိကြောင်း မြန်မာနိုင်ငံရဲတပ်ဖွဲ့၊ မှုခင်းဌာနက သတင်း ထုတ်ပြန်ထားသည်။
ထုတ်ပြန်ထားချက်အရ မှုခင်းဖြစ်ပွားမှု၊ သေဆုံးမှုနှင့် ဒဏ်ရာရရှိမှု အများဆုံးမှာ သင်္ကြန် အတက်နေ့တွင် အများဆုံး ဖြစ်ကြောင်း သိရပြီး လူသေဆုံးမှုမှာ ယာဉ်တိုက်ကြောင့် ၁၁ ဦး၊ သေမှုသေခင်းများတွင် ၁၂ ဦးနှင့် လူသတ်မှုကြောင့် ၃ ဦးတို့ ဖြစ်ကြောင်း သိရသည်။
ယင်းအမှုများနှင့် သေဆုံး၊ ဒဏ်ရာရ စာရင်းများသည် သင်္ကြန်လည်ပတ်မှုနှင့် ဆက်စပ်အကျုံးဝင်သော ဖြစ်ရပ်များသာ ဖြစ်ပြီး အကျုံးမဝင်သော မှုခင်းဖြစ်စဉ်များကို ထည့်သွင်းထားခြင်း မရှိကြောင်း ပြည်ထဲရေး ဝန်ကြီးဌာန လက်အောက်ရှိ မြန်မာနိုင်ငံ ရဲတပ်ဖွဲ့၊ လုံခြုံရေးနှင့် ထောက်လှမ်းရေး ဌာန ဒုတိယ ညွှန်ကြားရေးမှူး ဒုတိယ ရဲမှူးကြီး မင်းအောင်က ပြောသည်။
“သင်္ကြန်နဲ့ မဆိုင်တဲ့ဟာတွေ ထည့်မရေးထားဘူးပေါ့။ သင်္ကြန်မှာလည်လို့ သွားရင်းလာရင်းနဲ့ ဖြစ်တဲ့ဟာတွေကိုပဲ ထည့်ထားတာပါ” ဟု ဒုတိယ ရဲမှူးကြီး မင်းအောင်က ဧရာဝတီသို့ ပြောသည်။
ပဲခူးတိုင်းတွင် သင်္ကြန်အကျနေ့က ရဲဝန်ထမ်းတဦး မောင်းနှင်လာသည့်ကားသည် ရေကစားနေသည့် ကလေးများအား ဝင်တိုက်မိခဲ့သဖြင့် ကလေးနှစ်ဦး အခင်းဖြစ်ပွားရာ နေရာတွင်ပင် သေဆုံးသွားခဲ့ပြီး ကလေးငယ် တချို့ ဒဏ်ရာရရှိသွားကြောင်း သိရသည်။
အဆိုပါဖြစ်စဉ်နှင့် ပတ်သက်၍လည်း မှုခင်းဖြစ်စဉ် ထုတ်ပြန်ချက်၌ ပါဝင်ကြောင်း ယင်းအမှုနှင့် ပတ်သက်၍ ယာဉ်မောင်း ရဲဝန်ထမ်းအား သက်ဆိုင်ရက ဖမ်းဆီးထိမ်းသိမ်းထားပြီး ဥပဒေအရ အရေးယူ ဆောင်ရွက်သွားမည် ဖြစ်ကြောင်း သိရှိရသည်။
“သူက ရဲတပ်ဖွဲ့ဝင် ဆိုပေမယ့်လည်း သေမှုသေခင်းနဲ့ ဖွင့်ပြီးတော့ အရေးယူဖို့ လုပ်ထားပါတယ်။ လောလောဆယ်တော့ ချုပ်ထားတာပေါ့” ဟု ဒုတိယ ရဲမှူးကြီး မင်းအောင်က ပြောသည်။
မြန်မာနိုင်ငံ ရဲတပ်ဖွဲ့အနေဖြင့် ယခုနှစ် အတာသင်္ကြန်ကို ယခင်နှစ် သင်္ကြန်ကာလများထက် လုံခြုံရေးကို အထူး တင်းကြပ်စွာ ထားရှိပြီး ထိန်းသိမ်းခဲ့ကြောင်း ရဲတပ်ဖွဲ့က ဆိုသည်။
ယခုနှစ် အတာသင်္ကြန်သည် ပြီးခဲ့သည့် ၂၀၁၂ ခုနှစ် သင်္ကြန်ထက် သေဆုံးသူ ၁၈ ဦး ပိုများခဲ့ပြီး ယခင်နှစ်က ၈ ဦးသာ သေဆုံးခဲ့ကြောင်း ယခင်နှစ် သင်္ကြန်အပြီး ရဲတပ်ဖွဲ့၏ တရားဝင် ထုတ်ပြန်ထားချက်အရ သိရသည်။

မြန်မာပြည်အရေး OIC ပါဝင်ရန် မလိုအပ်

ခင်ဦးသာ| April 18, 2013 | Hits:5,477

ဆော်ဒီ အာရေးဗီးယား နိုင်ငံ Jeddah မြို့၌ ဧပြီ ၁၄ ရက်က ကျင်းပသော OIC နိုင်ငံခြားရေး ဝန်ကြီးများ အစည်း အဝေး(ဓာတ်ပုံ – တူရကီ နိုင်ငံခြားရေး ၀န်ကြီးရုံး ၀က်ဘ်ဆိုက်)

မိတ္ထီလာနှင့် ပဲခူးတိုင်းအတွင်း နေရာတချို့၌ ဖြစ်ပွားခဲ့သော ပဋိပက္ခများသည် မြန်မာနိုင်ငံ၏ ပြည်တွင်းရေးသာ ဖြစ်၍ အစ္စလမ်မစ် ပူးပေါင်းဆောင်ရွက်ရေး အဖွဲ့(OIC) အနေဖြင့် ပါဝင်ပတ်သက်ရန် မလိုအပ်ကြောင်း သမ္မတ ပြောရေးဆိုခွင့် ရှိသူက ပြောဆိုလိုက်သည်။
ယင်းသို့ မြန်မာ ဗုဒ္ဗဘာသာဝင်များနှင့် မွတ်စလင်တို့ အကြားဖြစ်ပွားခဲ့သော ပဋိပက္ခများအပြီး မွတ်စလင်များအရေး ဖြေရှင်းပေး ရန် အတွက် ၎င်းတို့၏ ကိုယ်စားလှယ်များ မြန်မာနိုင်ငံသို့ လာရောက် ဆွေးနွေးနိုင်ရန် အစိုးရကို ကမ်းလှမ်း တောင်းဆိုသွားမည်ဟု OIC က ပြောဆိုထားသည်။
OIC ၏ ထိုပြောဆိုချက်နှင့်ပတ်သက်၍ သမ္မတ ဦးသိန်းစိန်၏ ပြောရေးဆိုခွင့်ရှိသူ ပြန်ကြားရေး ဒု ၀န်ကြီး ဦးရဲထွဋ် က တုံ့ပြန် ပြော ဆိုခြင်း ဖြစ်သည်။
“OIC အစည်းအဝေးမှာ ဆုံးဖြတ်ခဲ့တယ်ဆိုတာကို နိုင်ငံတကာ သတင်းတွေအရပဲ သိရပါတယ်။ အစိုးရဆီကို အခုအချိန်အထိ တရားဝင် ကမ်းလှမ်းတာမျိုး မရှိသေးပါဘူး။ ကျနော့်အမြင် ပြောရရင်တော့ မကြာခင်က ဖြစ်ပွားခဲ့တဲ့ ပဋိပက္ခတွေဟာ ပြည်တွင်း ရေး ကိစ္စတွေသာဖြစ်ပါတယ်၊ ဒါ့ကြောင့် နိုင်ငံတကာ အဖွဲ့အစည်းတခု က ၀င်ရောက်ဆောင်ရွက်ဖို့ အကြောင်း မရှိဘူးလို့ပဲ ယူဆပါတယ်”ဟု ၎င်းက ဆိုသည်။
အစ္စလမ်နိုင်ငံ ၅၇ နိုင်ငံဖြင့် ဖွဲ့စည်းထားသော OIC အဖွဲ့၏ နိုင်ငံခြားရေး ဝန်ကြီးများ အစည်းအဝေးတခုကို ဆော်ဒီ အာရေးဗီးယား နိုင်ငံ Jeddah မြို့၌ ပြီးခဲ့သည့် ဧပြီလ ၁၄ ရက်နေ့က ပြုလုပ်ခဲ့ရာတွင် ၀န်ကြီးအဆင့် ကိုယ်စားလှယ်အဖွဲ့ တဖွဲ့ကို မြန်မာနိုင်ငံ သို့ လာရောက်ခွင့်ပြုရေး ကမ်းလှမ်းမည်ဖြစ်ကြောင်း နိုင်ငံတကာ သတင်း မီဒီယာများ၌ ရေးသားထားသည်။
မြန်မာပြည်တွင်း ပဋိပက္ခများနှင့်ပတ်သက်၍ ပြည်ထောင်စုအစိုးရ၊ တိုင်းဒေသကြီး အစိုးရများကလည်း စုံစမ်းစစ်ဆေးမှုများကို စနစ်တကျ ဆောင်ရွက်နေပြီ ဖြစ်ကြောင်း၊ ဥပဒေ ချိုးဖောက်သူများအား အရေးယူခြင်း၊ ဒုက္ခသည်များ ပြန်လည် နေရာချထား ရေး အစီအစဉ်များ စသည်တို့ကို ဆောင်ရွက်နေပြီ ဖြစ်ကြောင်းလည်း သမ္မတ ပြောခွင့်ရသူ က ပြောဆိုသည်။
မကြာသေးခင်က ဖြစ်ပွားသည့် မိတ္ထီလာ ပြဿနာသည် လူမျိုးရေး၊ ဘာသာရေး အဓိကရုဏ်း မဟုတ်ကြောင်း၊ သို့ဖြစ်၍ OIC အဖွဲ့က ပါဝင်ဖြေရှင်းရန် မလိုအပ်ကြောင်း၊ မြန်မာနိုင်ငံသို့ လာရောက်လည်ပတ်ခြင်း၊ ရုံးခန်းဖွင့်ခြင်းများလည်း လုပ်ဆောင်ရန် မလိုအပ်ကြောင်း ပခုက္ကူမြို့ မှ ရှင်မတောင် ဆရာတော် ဦးက၀ိန္ဒောဘာသ က ဧရာဝတီ ကို မိန့်ကြားသည်။