အဂတိလိုက်စားမှု မြန်မာနိုင်ငံအခြေအနေဆိုးရွား
VOA News, 5 December 2012 — ကမ္ဘာအ၀ှမ်း အဂတိလိုက်စားမှုအခြေအနေတွေကို
စစ်တမ်းယူဖော်ထုတ်နေတဲ့ Transparency International အဖွဲ့ကြီးရဲ့ နှစ်စဉ်
အစီရင်ခံစာထဲမှာ အဂတိလိုက်စားမှု အခြေအနေတွေနဲ့ ပတ်သက်လို့ မြန်မာနိုင်ငံ ဟာ
အောက်ဆုံးအဆင့်မှာပဲ ရှိနေဆဲဖြစ်ပါတယ်။မြန်မာနိုင်ငံ မှာ ရွေးကောက်ပွဲနဲ့ တက်လာတဲ့ အစိုးရအနေနဲ့ လာဘ်ပေးလာဘ်ယူမှုတွေကို တိုက်ဖျက်သွားမယ်လို့ ပြောထားပေမယ့် လက်တွေ့အောင်မြင်အောင် ဆောင်ရွက်ဖို့ အခက်အခဲတွေ ရင်ဆိုင်နေရတယ်လို့လည်း လေ့လာသူတွေက ဆိုပါတယ်။ ဒါနဲ့ပတ်သက်လို့တော့ ကိုသားညွန့်ဦးက စုံစမ်းမေးမြန်းထားပါတယ်။
Transparency International အဖွဲ့ထုတ်ပြန်တဲ့ ၂၀၁၂ ခုနှစ်အတွင်း ကမ္ဘာအနှံ့ အဂတိလိုက်စားမှု အခြေအနေ အစီရင်ခံစာထဲ မြန်မာနိုင်ငံကို အမှတ် ၁၅ မှတ်ပေးထားပါတယ်။ နိုင်ငံစဉ်အလိုက် တွက်မယ်ဆိုရင် မြန်မာနိုင်ငံဟာ အခြေအနေအဆိုးဆုံးနိုင်ငံ အောက်ဆုံးက ရေတွက်ရင် ၅ နိုင်ငံမြောက် ဖြစ်ပါတယ်။ မြန်မာနိုင်ငံမှာ ရွေးကောက်ပွဲနဲ့ အစိုးရသစ်တက်လာပြီးနောက် အဂတိ လိုက်စားမှုတွေကို တိုက်ဖျက်သွားမယ်လို့ သမ္မတဦးသိန်းစိန်က ကတိပေးခဲ့ပေမယ့် လက်တွေ့ လုပ်ဖို့ ရာမှာ အခက်အခဲတွေ ရှိနေတယ်လို့ လေ့လာသူတွေက သုံးသပ်ပါတယ်။ တည်ဆဲဥပဒေအတိုင်း လက်တွေ့ ဘယ်လို အကောင်အထည်ဖော်မလဲဆိုတဲ့ တရားဥပဒေစိုးမိုးရေး ကိစ္စရပ်တခုလည်း ဖြစ် တယ်လို့ မြန်မာစီးပွားရေးလုပ်ငန်းရှင်လည်းဖြစ်၊ စီးပွားရေးပညာရပ်ဆိုင်ရာ ကျွမ်းကျင်သူလည်းဖြစ်တဲ့ ဦးမင်းခင်က ပြောပါတယ်။
“အဂတိလိုက်စားမှု တိုက်ဖျက်မယ်ဆိုတဲ့ သူ့ဆန္ဒပေါ့နော်-Political will-ပေါ့- နိုင်ငံရေးအရ လုပ်ချင်တဲ့ ဆန္ဒကို ယုံကြည်ပါတယ်။ ကြိုးစားအားထုတ်နေတယ်လို့လည်း ပြောလို့ရတယ်။ သို့သော် ဖြစ်မြောက်မှု က တော်တော်လေး အားနည်းသေးတယ်။ လက်တွေ့ တွေ့လာရတာက အောက်ခြေ တချို့နေရာလေးတွေမှာပဲ ထိရောက်မှုရှိတာ တွေ့ရတယ်။ နောက်တခုက ဒီ လွှတ်တော်ထဲက ပိုပြီးတော့တောင်မှ အစိုးရဘက်နဲ့စာရင် အဂတိလိုက်စားမှုကို ပိုပြီးတော့ ထိထိရောက်ရောက် – ကိုင်တွယ်နိုင်တယ် ဆိုတာထက် ဖော်ထုတ်ရုံပေါ့လေ- အစလေးတွေ ဖော်ထုတ်ရုံလောက်ပဲ လုပ်နိုင်သေးတယ်။ ဆိုတော့ ဒါကလည်း တရားဥပဒေစိုးမိုးရေးနဲ့လည်း သွားတွဲနေတာကိုး။ တွဲနေတော့ အခုထိတော့ ထိထိရောက်ရောက် ကိုင်တွယ်နိုင်ဖို့ကို ပြောမယ်ဆိုရင် လိုတော့ လိုသေးတယ်လို့ ပြောရမယ်ဗျ။”
အမျိုးသားလွှတ်တော်ကိုယ်စားလှယ်တဦးဖြစ်သူ ဒေါက်တာမြတ်ဉာဏစိုးကလည်း အစိုးရအနေနဲ့ အဂတိလိုက်စားမှုတွေ တိုက်ဖျက်သွားမယ်ဆိုပေမယ့် တဘက်မှာ အရေးယူမှုတွေ ရှင်းရှင်းလင်းလင်း မတွေ့ရဘူးလို့ ပြောပါတယ်။
“အရင့်အရင် ခေတ်တွေတုန်းကထက်စာရင်တော့ အရင်ခေတ်နဲ့ ပြန်နှိုင်းကြည့်လိုက်ရင်တော့ လျော့ကျသွားဖွယ်ရာရှိတယ်လို့တော့ ပြောလို့ရပါတယ်။ အခုဆို တိုင်ကြားဖို့ ဖုန်းနံပါတ်တွေ၊ ပြည်ထဲရေးဝန်ကြီးဌာနပေါ့နော်။ အထူးစုံစမ်းစစ်ဆေးရေး ဦးစီးဌာနကနေပြီးတော့ ဆက်သွယ်တိုင်ကြားဖို့ ဖုန်းနံပါတ်တွေကို နေ့စဉ်ထုတ် သတင်းစာတွေထဲမှာ ထည့်သွင်းပြီးတော့ ဖော်ပြထားတာ ရှိပါတယ်။ ဒါပေမဲ့ ကျနော်တို့ တချက် ပြန်ကြည့်ရမှာက ဒီလိုတိုင်ကြားတဲ့ဖြစ်စဉ်တွေ ဘယ်နှစ်ခု ရှိခဲ့ပြီလဲ၊ ရှိခဲ့ပြီးတဲ့ဖြစ်စဉ်တွေပေါ်မှာရော ဘယ်လို အရေးယူ ဆောင်ရွက်မှု တွေ ရှိနေပြီလဲ၊ လာဘ်ပေးလာဘ်ယူမှုအပေါ်မှာ ဆောင်ရွက်ခဲ့တဲ့ သက်ဆိုင်ရာ အဖွဲ့အစည်းတွေ၊ ဝန်ထမ်းတွေကို ဘယ်လိုတွေ အရေးယူပြီးပြီလဲ ဆိုတာကိုတော့ ထုတ်ပြန်တဲ့အပိုင်းက သိပ် ပွင့်လင်းမြင်သာမှု မရှိသေးဘူးလို့ မြင်ရပါတယ်ခင်ဗျ။”
တကယ်တော့ အဂတိလိုက်စားမှုတိုက်ဖျက်ရေးဟာ လက်ရှိ သွားနေတဲ့ မြန်မာပြုပြင်ပြောင်းလဲရေး အတွက်ပါ အရေးကြီးတယ်လို့ အစိုးရဘက်ရော၊ လွှတ်တော်ရော၊ မြန်မာ့အရေးလေ့လာသူတွေကပါ ယူဆထားကြတာပါ။ ဒါကြောင့်လည်း အဂတိလိုက်စားမှု အခြေအနေဟာ အပြောင်းအလဲအတွက်ကို စိန်ခေါ်ချက်တရပ်လိုဖြစ်နေတယ်လို့ ဦးမင်းခင်က ပြောပါတယ်။
“ဆက်ဆံရေးဘက်မှာ ပြောင်းလဲတာတော့ ကျနော်တို့တွေ့တယ်။ ဖမ်းသွားတယ် ဆိုတာမျိုးထက် စောင့်ကြည့်တယ် ဆိုတာမျိုးပေါ့။ အဲဒါမျိုး ပိုပြီး ပြောရမယ်ထင်တယ်။ တရားဥပဒေက လုပ်သင့်လုပ်ထိုက်တဲ့ အရေးယူမှု မရှိရင်တော့ နည်းနည်းလေး ပြောင်းသွားတဲ့ဟာတောင်မှ ပြန်ပြီးတော့ နဂိုရ်ပုံစံ ပြန်ဖြစ်သွားနိုင်တယ်။ ဒါက အပြောင်းအလဲအတွက် ခြိမ်းခြောက်မှုတစ်ခုပဲ။”
လွှတ်တော်ပိုင်းကလည်း အဂတိလိုက်စားမှုတိုက်ဖျက်ရေးအတွက် ကြိုးပမ်းနေပေမယ့် အရေး ယူမှုတွေကို လက်တွေ့ဆောင်ရွက်ရမယ့် အုပ်ချုပ်ရေးပိုင်းက ပွင့်လင်းမြင်သာမှု ရှိသေးဘူးလို့လည်း အမျိုးသားလွှတ်တော် ကိုယ်စားလှယ် ဒေါက်တာမြတ်ဉာဏစိုးက ဝေဖန်ပါတယ်။
“လွှတ်တော်တွေမှာ လာဘ်ပေးလာဘ်ယူမှု တိုက်ဖျက်ရေးဥပဒေတွေကို ရေးဆွဲနေပါတယ်။ နောက်ဆုံးအဆင့်ကို ရောက်နေပါပြီ။ ဒီဥပဒေ ထွက်လာတဲ့အခါကျတော့မှ အတည်ပြုချက်ကျတယ်။ ဘယ်လို အရေးယူဆောင်ရွက်မယ်ဆိုတာက ရှိလာမှာပါ။ အခု ကျနော်တို့ဆီမှာက ရှိနေတဲ့ ဥပဒေဟာ အဂတိလိုက်စားမှု တိုက်ဖျက်ရေးဥပဒေကတော့ ရှိပါတယ်။ ၁၉၅၀ ကျော်- ၅၆ လောက်တုန်းက ပြဌာန်းထားတာပါ။ ဒါပေမဲ့ အဲဒါတွေကို လိုတာတွေကို ဖြည့်စွက်ပြီးတော့ ဥပဒေအသစ် ရေးဆွဲနေပါတယ်။ နောက်တချက်အနေနဲ့ကတော့ လာဘ်ပေးလာဘ်ယူမှု ဖြစ်စဉ်တွေနဲ့ ပတ်သက်ပြီးတော့ မေးခွန်းတွေ မေးမြန်းတာရှိပါတယ်။ အဲဒါကို ဘယ်လို အရေးယူဆောင်ရွက်ထားမှု ရှိမရှိဆိုတာကို မေးပါတယ်။ မေးတဲ့အခါကျတော့လည်း ပြည်ထောင်စုအစိုးရဘက်ကတော့ သိပ်ရှင်းရှင်းလင်းလင်းတော့ ဖြေကြားနိုင်ခြင်း မရှိပါဘူးခင်ဗျ။ ”
အခုလို အဂတိလိုက်စားမှုတွေဟာ နိုင်ငံရေးတင်မက စီးပွားဖွံ့ဖြိုးတိုးတက်ဖို့နဲ့ နိုင်ငံတကာနဲ့ ကုန် သွယ်ရေးလုပ်ငန်းတွေ ကျယ်ကျယ်ပြန့်ပြန့် ထိစပ်လုပ်ကိုင်လာနိုင်ဖို့အတွက်ပါ ထိခိုက်မှု ရှိနေတယ်လို့ သုံးသပ်ကြပါတယ်။ ငွေကြေးဝန်ဆောင်မှုလုပ်ငန်းတခုဖြစ်တဲ့ YGA Capital က အမှုဆောင် ညွန်ကြားရေးမှူး ဦးသူရကိုကိုကတော့ မြန်မာနိုင်ငံမှာ အတော်လေးအမြစ်တွယ်နေတဲ့ ကိစ္စရပ် အတော်များများ ရှင်းဖို့ရှိတယ်လို့ ဗွီအိုအေကို ပြောပါတယ်။
“ပြီးခဲ့တဲ့ နှစ်နှစ်နီးပါး ၁၈ လတာ ကာလအတွင်းမှာ အခုလို စိန်ခေါ်မှုတွေကို အတတ်နိုင်ဆုံး လျှော့သွားအောင် လုပ်နေကြပါတယ်။ နိုင်ငံရေး စစ်ရေး စသဖြင့် နယ်ပယ်စုံမှာပါ။ ဈေးကွက်တခါး ဖွင့်လိုက်တဲ့ အခြေအနေမှာ နေ့စဉ်လိုလို စိန်ခေါ်ချက်တွေရှိပါတယ်။ အဂတိလိုက်စားမှုနဲ့ ပွင့်လင်း မြင်သာမှုမရှိတာတွေ၊ ဒေသခံလုပ်ငန်းရဲ့ ရွေးချယ်ခွင့်၊ ကြိုးနီတရားရေးစနစ်နဲ့ အရပ်ဖက်အုပ်ချုပ်မှု၊ အခြေခံအဆောက်အအုံကင်းမဲ့မှု စသဖြင့် အခြေအနေတွေ ရှိပါတယ်။ အားလုံးလိုလို တပုံစံတည်း တော့ မဟုတ်ဘူးပေါ့။ ဒါပေမယ့် မြန်မာနိုင်ငံက အထီးကျန်ခဲ့တာကြာတော့ အတော်လေး ပြဿနာ ကြီးပါတယ်။” ဆိုပြီး ဦးသူရကိုကို ပြောသွားတာပါ။
အခု Transparency အစီရင်ခံစာထဲ မြန်မာနိုင်ငံ အောက် မှာတော့ ဆူဒန်နိုင်ငံ၊ အာဖဂနစ္စတန်၊ မြောက်ကိုရီယားနဲ့ ဆိုမားလီယားနိုင်ငံတွေပဲ ရှိပါတယ်။ အရှေ့တောင်အာရှ ပတ်ဝန်းကျင်နိုင်ငံတွေထဲမှာဆိုရင် အဂတိလိုက်စားမှုအခြေအနေ မြန်မာနိုင်ငံဟာ အဆိုးဆုံးလို့ ပြောနိုင်ပါတယ်။ အစီရင်ခံစာအတိုင်းဆိုရင် ဒိန်းမတ်၊ ဖင်လန်၊ နယူးဇီလန်နိုင်ငံတို့ကတော့ အမှတ် ၉၀ နဲ့ အဂတိ လိုက်စားမှုအနည်းဆုံး အပေါ်ဆုံးအဆင့် နိုင်ငံတွေဖြစ်ကြပါတယ်။ အမှတ်အားဖြင့် အမေရိကန် ပြည်ထောင်စုကတော့ အမှတ် ၇၃၊ တရုတ်နိုင်ငံက အမှတ် ၃၉ တို့ ရရှိထားကြပါတယ်။
ကိုသားညွန့်ဦး
No comments:
Post a Comment