မြန်မာနိုင်ငံက တင်နေတဲ့ အကြွေး ဒေါ်လာ သန်း ၉၀၀ ကို ဂျပန် စိုက်ဆပ်မယ်

မြန်မာနိုင်ငံက တင်နေတဲ့ အကြွေး ဒေါ်လာ သန်း ၉၀၀ ကို ဂျပန် စိုက်ဆပ်မယ်  

11:43 AM  ကချင်နေ့စဉ်သတင်း  

အောက်တိုဘာ(၁၃)

 

 

 

 

 

photo-မြန်မာ ဘဏ္ဍာရေး ဝန်ကြီး ဦးဝင်းရှိန်နဲ့ ဂျပန်ဘဏ္ဍာရေးဝန်ကြီး Koriko Jojima 

တိုကျိုမြို့မှာ ကျင်းပတဲ့ နိုင်ငံတကာ ငွေကြေးဆိုင်ရာ အဖွဲ့အစည်းတွေရဲ့ ညီလာခံ ကနေ ထွက်လာတဲ့ သတင်းတွေ အရ မြန်မာနိုင်ငံမှာ ပြုပြင်ပြောင်းလဲမှုတွေ စခဲ့ပြီးတဲ့ နောက်ပိုင်းမှာ ဂျပန်နိုင်ငံဟာ မြန်မာအပေါ် အကူညီအများဆုံး ပေးတဲ့ နိုင်ငံဖြစ်လာပါတယ်။

အခုနောက်ဆုံး အစီအစဉ်အရ ကမ္ဘာ့ဘဏ်ကို မြန်မာက ပေးစရာရှိတဲ့ အကြွေးဒေါ်လာသန်း ၄၀၀ နဲ့ ADB အာရှဖွံ့ဖြိုးရေး ဘဏ်ကို ပေးစရာရှိတဲ့ ဒေါ်လာသန်း ၅၀၀ စုစုပေါင်း ဒေါ်လာသန်း ၉၀၀ ကို ဂျပန်နိုင်ငံက စိုက်ပြီး ဆပ်ပေးမှာဖြစ်ပါတယ်။မြန်မာနိုင်ငံက ပေးစရာ ကျန်နေတဲ့ကြွေးမြီတွေကို ၂၀၁၃ ဇန်နဝါရီလမှာ ဂျပန်နိုင်ငံက စိုက်ပြီး ဆပ်ပေးဖို့အတွက် ဆုံးဖြတ် လိုက်ပြီ ဆိုတာကို ဝမ်းမြောက်စွာနဲ့ပြောလိုကြောင်း၊ ၁၉၈၇ နှစ်တုန်းက မြန်မာနိုင်ငံအပေါ် အထူးချေးငွေ ပေးထားတဲ့ အစီအစဉ်ကို သက်တမ်းတိုး ပေါင်းကူးပေးလိုက်ပြီး၊ ကြွေးမြီတွေကို ပယ်ဖျက်ပေးလိုက်ကြောင်း ဂျပန် ဘဏ္ဍာရေး ဝန်ကြီး Koriki Jojima က အဲဒီညီလာခံမှာ ပြောသွားပါတယ်။

အဲဒီငွေတွေကို ဂျပန်နိုင်ငံရဲ့ နိုင်ငံတကာ ပူးပေါင်းဆောင်ရွက်ရေး ဆိုင်ရာ ဘဏ်ကနေ ထုတ်ပေးမှာဖြစ်ပါတယ်။

အခုနှစ်ဧပြီလ တုန်းကလည်း ဂျပန်နိုင်ငံက မြန်မာအပေါ် တင်ရှိနေတဲ့ကြွေးမြီ ယန်းငွေဘီလျံ ၅၀၀၊ ဒေါ်လာနဲ့ဆိုရင် ၆.၄ ဘီလျံထဲက ယန်းငွေဘီလျံ ၃၀၀ ကိုလျှော်ပေးခဲ့ပါတယ်။

အခုလို ဂျပန်နိုင်ငံရဲ့ ကူညီမှုနဲ့ ပတ်သက်ပြီး ကျေးဇူးတင် ကြောင်း မြန်မာ ဘဏ္ဍာရေး ဝန်ကြီး ဦးဝင်းရှိန်က ပြန်လည် ပြောကြားခဲ့ပြီး မြန်မာနိုင်ငံကို အာရှနိုင်ငံတွေနဲ့အတူ ယှဉ်တွဲပြီး ငြိမ်းချမ်း တည်ငြိမ်တဲ့ ဒီမိုကရေစီ နိုင်ငံ အဖြစ် အားလုံး ပါဝင် တည်ဆောက်နိုင်အောင် ဆောင်ရွက်ဖို့ စိတ်ပိုင်းဖြတ်ထားကြောင်း ကိုလည်းပြောခဲ့ပါတယ်။

ဂျပန်နိုင်ငံဟာ ရန်ကုန်မြို့မှာ ရထားလမ်းနဲ့ ရေပေးဝေရေး စနစ်တွေ တည်ဆောက်ဖို့ အပါအဝင် မြန်မာနိုင်ငံရဲ့ အခြေခံ အဆောက်အဦတွေ ဆောက်လုပ်တဲ့ လုပ်ငန်းမှာ ရင်းနှီးမြှုပ်နှံဖို့ လေ့လာနေပြီး အဲဒီ စီမံကိန်းတွေမှာ အသုံးပြုဖို့ အထူးသက်သာတဲ့ အတိုးနှုန်းနဲ့ နှစ်ရှည် ချေးငွေတွေကို ထုတ်ချေးမယ့် အစီအစဉ်လည်း ရှိတယ်လို့ New York Times သတင်းစာက ရေးပါတယ်။

ဒါ့အပြင် ရန်ကုန်မြို့အတွက် ဓါတ်အားပေး စက်ရုံတည်ဆောက်ရေး၊ သီလဝါဆိပ်ကမ်းနဲ့ ပဲခူးမြစ်ကူးတံတား တည်ဆောက်ရေး တွေကိုလည်း ဆောင်ရွက်ချင်နေတယ်လို့ ဆိုပါတယ်။

ပတ်ဝန်းကျင် ထိန်းသိမ်း စောင့်ရှောက်ရေးနဲ့ ပတ်သက်လို့ ဂျပန်နိုင်ငံက အထူး အလေးထားတာကြောင့် အခုလို မြန်မာနိုင်ငံမှာ ဂျပန်နိုင်ငံက ရင်းနှီးမြှုပ်နှံမှုတွေ လုပ်ဖို့ စိတ်ဝင်စားတာဟာ ကောင်းတဲ့ အလားအလာ ဖြစ်တယ်လို့ ဂျပန်နိုင်ငံ ကန်တ တက္ကသိုလ်က ဒေါက်တာ အေးချမ်းက သုံးသပ်ပါတယ်။

BBC