လာမည့်နှစ်ကျောင်းကားဈေးကွက်သို့ ဝင်ရောက်ရန် ဂျပန်မီနီဘတ်စ်အစီး(၅ဝ)မှာယူ

လာမည့်နှစ်ကျောင်းကားဈေးကွက်သို့ ဝင်ရောက်ရန် ဂျပန်မီနီဘတ်စ်အစီး(၅ဝ)မှာယူ

ရှုမဝအောင်(မြစ်မခ)
by Myit Makha Mediagroup on 6 Aug, 2012

၂ဝ၁၃-၂ဝ၁၄ ပညာသင်နှစ်အတွင်း ရန်ကုန်မြို့ရှိ ကျောင်းသားများတွင် ဈေးနှုန်း သက်သာစွာဖြင့် ကျောင်းကြိုပို့ပေးနိုင်ရန် ဂျပန်နိုင်ငံမှမီနီဘတ်စ်ကားအစီးရေ (၅ဝ)ကို တင်သွင်းမည်ဖြစ်ကြောင်း သိရသည်။

အဆိုပါ ကျောင်းကားများအား အထက်တန်းကျောင်းများနှင့် မူကြိုကျောင်းများတွင် ပြေးဆွဲမည် ဖြစ်ပြီး ကားတင်သွင်းခ ကုန်ကျစရိတ်များကို သိန်းခြောက်ထောင်ခန့် ခန့်မှန်းထားကြောင်း Father Land ဆောက်လုပ်ရေးမှ ပြန်ကြားရေး တာဝန်ခံကိုမိုးကျော်က ပြောသည်။

 “ကျောင်းတွေကို ပြေးဆွဲတဲ့နေရာမှာ ကျွန်တော်တို့က လက်ရှိပြေးဆွဲနေတဲ့ ကားတွေထက် ဈေးလည်း သက်သာရမယ်၊ ဝန်ဆောင်မှုလည်း ကောင်းရမယ်၊ ကလေးတွေကို သက်တောင့် သက်သာနဲ့ သွားလို့ရအောင် ရည်ရွယ်ပါတယ်'' ဟုပြန်ကြားရေးတာဝန်ခံ ကိုမိုးကျော်က ပြောသည်။

ကျောင်းကားများကို တောင်ဥက္ကလာပမြို့နယ်၊သင်္ဃန်းကျွန်းမြို့ နယ်များတွင် စတင်ပြေးဆွဲမည်ဖြစ်ပြီး လူဦးရေ (၃ဝ)စီးနင်းနိုင်သော ကားများဖြစ်ကြောင်းကိုလည်း သိရသည်။

ထိုကဲ့သို့ပြေးဆွဲနိုင်ရန် ရန်ကုန်တိုင်း ပညာရေးဝန်ကြီးဌာန၊ ဝန်ကြီးချုပ်များနှင့်ညှိနှိုင်းဆောင်ရွက်ပြီးဖြစ်ကြောင်း Father Land က ဆိုသည်။

ကျောင်းကားများ ပြေးဆွဲရာတွင် ကျွမ်းကျင် ယာဉ်မောင်းများနှင့်ယာဉ်မယ်များကိုလည်း ထားရှိသွားမည်ဟု သိရသည်။

 “ မူကြိုကျောင်းတွေကိုတော့ စူပါကတ်စတန်နဲ့ ပြေးဆွဲမယ်၊ ပြည်တွင်းမှာရှိတဲ့ စူပါကတ်စတန်တွေကို အရည်သွေး မြင့်မယ်၊ ပြည်တွင်း စက်မှုဇုန်တွေနဲ့ညှိနှိုင်းပြီးတော့ လုပ်ဖို့လည်း ကျွန်တော်တို့ ရှိပါတယ်ဟု ပြန်ကြားရေးတာဝန်ခံ ဦးမိုးကျော်က ပြောသည်။

အဆိုပါ ကျောင်းကားများကို ၂ဝ၁၃ခုနှစ် -၂ဝ၁၄ခုနှစ် ပညာသင်နှစ်တွင် စတင်ပြေးဆွဲပြေးဆွဲမည်ဖြစ်ပြီး၊ တက္ကသိုလ် ကျောင်းကားများအတွက် လက်ရှိတွင်ပြေးဆွဲရန် အစီအစဉ်မရှိသေးကြောင်းကိုလည်း သိရှိရသည်။

လက်ရှိ ကျောင်းကားယာဉ်မောင်းများအနေဖြင့်လည်း Father Land မှ တစ်နိုင်ငံလုံးအတိုင်းတာနှင့် လုပ်ဆောင်နိုင်ပါက   ကောင်းမွန်သော အစီစဉ်ဖြစ်ပြီး  ကျောင်းကားဈေးကွက်လည်း ပြောင်းလဲ သွားနိုင်မည်ဖြစ်ကြောင်း

“ သူတို့က အဆင့်မြင့်ကားတွေနဲ့ပြေးဆွဲမယ်ဆိုလဲ သူဟာနဲ့သူတော့ ပြေးပေါ့၊ ကျွန်တော်တို့ စီးနေကြမိတ်နဲ့ကျွန်တော်တို့ရှိပြီးသားပါ၊ သူက တစ်နိုင်ငံလုံးအတိုင်းတာလုပ်နိုင်မှာလား ’’ဟု ကျောင်းကားမောင်းသူ ကိုဇော်မင်းက ပြောသည်။

လက်ရှိတွင် ရန်ကုန်ကျောင်းကားဈေးကွက်မှာ ခရီးအကွာအဝေးပေါ်လိုက်၍ကျောင်းသားတစ်ဦး လျှင် ကျပ်- ၈ဝဝဝ ဝန်းကျင်မှ ကျပ်-၂ဝဝဝဝ အထိဈေးရှိကြောင်း ကျောင်းကားပြေးဆွဲနေသူများ ထံက သိရှိရသည်။