ရွှေဈေးကွက် ရောင်းအား-ဝယ်အား မျှ၊ နယ်ဝယ်လက်များ လိုက်လာ
ရန်ကုန် (မဇ္ဈိမ) . ၇ရက်နေ့ ဒီဇင်ဘာ ၂၀၁၂ —- ဒီဇင်ဘာလ ပထမပတ်အတွင်း
ရန်ကုန် ရွှေဈေးကွက်တွင် ရောင်းလိုအားနှင့် ဝယ်လိုအား မျှနေကြောင်း
ရန်ကုန်တိုင်း ရွှေလုပ်ငန်းရှင်များ အသင်းက ဆိုသည်။“ဒီဇင်္ဘာ ပထမအပတ် ရွှေဈေးကွက်အတွင်း ရောင်းအားနဲ့ ဝယ်အား မျှနေပါတယ်။ ပွင့်လင်းရာသီ ရောက်လာတာ
ကြောင့် ရွှေကုန်ကြမ်းတွေ ရန်ကုန်ဘက် အဝင်လှိုင်လာတယ်။
အခုအချိန်က စပါးပေါ်ချိန်၊ ပဲပေါ်ချိန် ဖြစ်တာကြောင့် နယ်ဝယ်လက်တွေလည်း အဝယ်ရှိလာတယ်” ဟု အသင်းမှ အတွင်းရေးမှုး ဦးဝင်းမြင့် က မဇ္ဈိမကို ပြောသည်။
ဒီဇင်္ဘာလ ၃ ရက်နေ့တွင် အခေါက်ရွှေ ၁ ကျပ်သားလျှင် ကျပ် ၇၇၁,၉ဝဝ နှင့် ဈေးဖွင့်ခဲ့ပြီး ညနေပိုင်းတွင် ကျပ် ၇၆၉,၅ဝဝ ဖြင့် ပိတ်ခဲ့သည်။ ထိုနေ့ ကမ္ဘာ့ရွှေဈေးမှာ ၁ အောင်စလျှင် ၁,၇၁၈ ဒေါ်လာ ဝန်းကျင်တွင် ရှိခဲ့သည်။ (၁ အောင်စလျှင် ၁ ကျပ် ၁၄ ပဲ စီးကာ ၁ ဒေါ်လာလျှင် ကျပ် ၈၄ဝ ပျမ်းမျှပေါက်သည်။)
ဒီဇင်္ဘာ ၄ ရက်တွင် အခေါက်ရွှေ ၁ ကျပ်သားလျှင် အဖွင့်ဈေး ၇၆၈,ဝဝဝ ကျပ်ရှိခဲ့ပြီး အပိတ်ဈေးမှာ ကျပ် ၇၆၃,ဝဝဝ
ဖြစ်ခဲ့သည်။ ထိုနေ့ ကမ္ဘာ့ရွှေဈေးမှာ ၁ အောင်စလျှင် ၁,၇၁၂-၁,၆၉၁ ဒေါ်လာ ဖြစ်ခဲ့သည်။ ဒီဇင်္ဘာ ၅ ရက်တွင် အခေါက်ရွှေ ၁ ကျပ်သားလျှင် ကျပ် ၇၆၄,၃ဝဝ ဖြင့် ဈေးဖွင့်ခဲ့ပြီး ကျပ် ၇၆၆,ဝဝဝ ဖြင့် ဈေးပိတ်ခဲ့သည်။ ထိုနေ့ ကမ္ဘာ့ရွှေဈေးမှာ ၁ အောင်စလျှင် ၁,၇ဝ၂-၁,၆၉၅ ဒေါ်လာ ရှိခဲ့သည်။
“ဒီဇင်ဘာလဆန်းထဲမှာ အရပ်ဝယ်လက်သမားတွေ ရောင်းထားတဲ့ ရွှေ ပြန်ဖြည့်လာတယ်။ ရွှေထည် လုပ်ရောင်းတဲ့ သူတွေလည်း အခေါက်ရွှေ ဝင်ဝယ်တာ တွေ့ရတယ်။ ဒီတပတ်မှာ ရန်ကုန်၊ မန္တလေး လက်ကြီးရောင်းအားပေါ် မူတည်ပြီး ဈေးပြောင်းတာ တွေ့ရတယ်” ဟု ရွှေကုန်သည် ဦးမောင်သိန်း က မဇ္ဈိမကို ပြောသည်။
ထိုသီတင်းပတ်အတွင်း နယ်စပ်ဘက်သို့ ရောင်းချသည့် တရုတ် ဝယ်လက် မရှိကြောင်း သိရသည်။
“ဒီတပတ်ထဲမှာ ကမ္ဘာ့ရွှေဈေး နည်းနည်းအေးတယ်ဆိုပေမယ့် ပြည်တွင်း အခေါက်ရွှေဈေး တအားကြီး မကျဘူး။ အကယ်၍သာ ရန်ကုန်-မန္တလေး လက်ကြီးတွေ ရွှေထုတ်ရောင်းရင် ရွှေဈေးက ဒီထက်အေးဖို့ ခက်လိမ့်မယ်။ လက်ကြီးတွေ ထုတ်မရောင်းတော့ရင်တော့ အခုလို ကမ္ဘာ့ဈေး ခပ်အေးအေးနဲ့ဆိုရင် ရွှေဈေး ကျဖို့ ခက်လိမ့်မယ်” ဟု ရွှေကုန်သည်များက သုံးသပ်ကြသည်။
ပြီးခဲ့သည့် နိုဝင်ဘာလ နောက်ဆုံးပတ် ၂၆ ရက်တွင် ပြည်တွင်းအခေါက်ရွှေ ၁ ကျပ်သားလျှင် ၇၈ဝ,ဝဝဝ-၇၇၉,ဝဝဝ ကျပ် ရှိခဲ့ပြီး ကမ္ဘာ့ရွှေ ၁ အောင်စလျှင် ၁,၇၄၉-၁,၇၄၉ ဒေါ်လာ ရှိခဲ့သည်။ နောက်တနေ့တွင် အခေါက်ရွှေ ၁ ကျပ်သားလျှင် ၇၇၉၂ဝဝ-၇၇၈,၂ဝဝ ကျပ်ရှိခဲ့ပြီး ကမ္ဘာ့ရွှေ ၁ အောင်စလျှင် ၁,၇၅ဝ-၁,၇၄၅ ဒေါ်လာဖြစ်ခဲ့သည်။
နိုဝင်ဘာလ ၂၉ ရက်တွင် အခေါက်ရွှေ ကျပ် ၇၇၃,ဝဝဝ-၇၇၆,၃ဝဝ ရှိခဲ့ပြီး ကမ္ဘာ့ရွှေဈေးတွင် ၁,၇၂ဝ-၁,၇၂၆ ဒေါ်လာ
ဖြစ်ခဲ့သည်။ လကုန်ရက်တွင် အခေါက်ရွှေ ကျပ် ၇၇၆,ဝဝဝ-၇၇၄,ဝဝဝ ရှိခဲ့ပြီး ကမ္ဘာ့ရွှေဈေးမှာ ၁,၇၂၇-၁,၇၂ဝ
ဒေါ်လာ ရှိခဲ့ကြောင်း သိရသည်။
ခင်မျိုးသွယ်
No comments:
Post a Comment