နာဂသည် ချင်းမဟုတ်
နာဂလူမျိုးကို ချင်းမျိုးနွယ်စု ၅၃ စုထဲတွင် ပါဝင်သည်ဟု အစိုးရက သတ်မှတ်ထားသည် (ဓာတ်ပုံ – blog.myanmarlife.com)ယင်းကြေညာချက်သည် ဖေဖော်ဝါရီလ ၂၇ရက်နေ့က ပြုလုပ်သော ပြည်သူ့လွှတ်တော် အစည်းအဝေးတွင် ရွာငံမဲဆန္ဒနယ်မှ လွှတ်တော်ကိုယ်စားလှယ် ဦးအောင်သိန်းကတိုင်းရင်းသား မျိုးနွယ်စု ၁၃၅ မျိုးနှင့် ပတ်သက်သော မေးခွန်းမေးမြန်းရာ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဋ္ဌာန ဒုတိယ၀န်ကြီး ဦးဝင်းမြင့်က နာဂလူမျိုးကို ချင်းမျိုးနွယ်စု ၅၃ စုထဲတွင် ပါဝင်ကြောင်း ပြောကြားခဲ့ခြင်းအပေါ် တုံ့ပြန်ခြင်းဖြစ်သည်။
”ရည်ရွယ်ချက်ရှိရှိနဲ့ ပြောတာပဲ ဖြစ်ဖြစ်၊ ရည်ရွယ်ချက် မရှိဘဲနဲ့ ပြောတာပဲဖြစ်ဖြစ် ချင်းမျိုးနွယ်စုထဲမှာ နာဂကို ထည့်လိုက်တာဟာ မျိုးနွယ်စုကို ထိခိုက်တဲ့အတွက် နာဂလူမျိုးတွေကို
စိတ်အနာတရ ဖြစ်စေတယ်။ ချင်းလူမျိုးတွေက ကျနော်တို့ နာဂလူမျိုးတွေကို သူတို့အထဲမှာ မထည့်လို့လည်း ဘာမှနစ်နာသွားစရာ မရှိဘူး။ ကျနော်တို့ လုပ်နေရတဲ့ ရည်ရွယ်ချက်ကလည်း စိတ်ဝမ်းကွဲမှု မဖြစ်စေဖို့အတွက် အောက်ခြေမှာ အဓိကရုဏ်းဆန်တဲ့ ကိစ္စရပ်တွေဖြစ်မလာဖို့ အတွက် အခု သတင်းစာရှင်းလင်းပွဲကို ကြိုးစားလုပ်ဆောင်ရခြင်း ဖြစ်ပါတယ်”ဟု နာဂကျောင်းသားလူငယ်များအဖွဲ့ချုပ်(ရန်ကုန်)မှ ဥက္ကဋ္ဌ ဦးနော်အောင်ဆန်းက ပြောသည်။
တိုင်းရင်းသား လူမျိုးအားလုံးသည် သူ့သမိုင်း၊ သူ့ယဉ်ကျေးမှု အမှတ်အသား နှင့် ဖြတ်သားလာသော လူမျိုးများဖြစ်ကြောင်း၊ နာဂလူမျိုးများသည် ကိုယ်ပိုင်ဘာသာစကား၊ ယဉ်ကျေးမှု၊ဓလေ့ထုံးတမ်းအစဉ်အလာနှင့် ထူးခြားသော ၀ိသေသလက္ခဏာ၊ နာဂလူမျိုးများနေထိုင်ရာ မြေနယ်နမိတ်နှင့် လူဦးရေ အချိုးအရ မြန်မာနိုင်ငံ၏ ၂၀၀၈ ဖွဲ့စည်းပုံအခြေခံဥပဒေတွင် ”နာဂကိုယ်ပိုင်အုပ်ချုပ်ခွင့်ရဒေသ”ဟု အတိအလင်း ပြဋ္ဌာန်းထားကြောင်း၊ ပြည်သူ့လွှတ်တော်တွင် နာဂလူမျိုးအား ချင်းမျိုးနွယ်စု ၅၃ စုတွင် ပါဝင်သော မျိုးနွယ်စုတခုအဖြစ် တရားဝင် ထည့်သွင်းကာ ပြန်လည်ဖြေကြားမှုမှာ မည်သို့မျှလက်ခံနိုင်စရာ မရှိကြောင်း၊ မြန်မာနိုင်ငံသည် ပြည်ထောင်စုတိုင်းရင်းသားများ အချင်းချင်း စည်းလုံးညီညွှတ်မှုရရှိအောင် ကြိုးပမ်းဆောင်ရွက်နေချိန်တွင် လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဋ္ဌာနက ခိုင်မာမှုမရှိ ကြောင်းကျိုးညီညွှတ်မှုမရှိသော ဖြေကြားမှုမှာ တိုင်းရင်းသား စည်းလုံးညီညွှတ်ရေးကို ထိခိုက်စေနိုင်သောကြောင့် ပြင်းထန်စွာ ကန့်ကွက်ကြောင်း၊ တိုင်းရင်းသား လူမျိုးစာရင်းကို ပြန်လည်ပြင်ဆင်ပြီး တိကျမှန်ကန်စွာ ပြန်လည်ထုတ်ပေးရန် လေးနက်စွာ တောင်းဆိုကြောင်း နာဂလူမျိုးများက သဘောထားထုတ်ပြန်သည်။
နာဂလူမျိုးများနှင့် ဆိုင်သော အဖွဲ့အစည်း ၅ ခုဖြစ်သော နာဂယဉ်ကျေးမှု မြို့နယ်ကော်မတီ(ရန်ကုန်)၊ နာဂတောင်တန်း ဖွံ့ဖြိုးတိုးတက်ရေးကွန်ရက်၊နာဂကျောင်းသား လူငယ်များ အဖွဲ့ချုပ်၊ နာဂနှစ်ခြင်းခရစ်ယာန်အဖွဲ့ချုပ်နှင့် နာဂနှစ်ခြင်း ခရစ်ယာန်တပည့်တော်စု(ရန်ကုန်)တို့က ကန့်ကွက်ခဲ့ကြခြင်း ဖြစ်သည်။
အခြားတောင်းဆိုချက်နှစ်ခုမှာ ရန်ကုန်မြို့ရှိ တိုင်းရင်းသားကျေးရွာတွင် နာဂလူမျိုးများအား ချင်းတိုင်းရင်းသား မျိုးနွယ်စုအဖြစ် ထည့်သွင်းဖော်ပြထားခြင်း၊ နာဂလူမျိုးများ၏ ရိုးရာယဉ်ကျေးမှု အသုံးအဆောင်ပစ္စည်းများကိုလည်း ချင်းတိုင်းရင်းသားလူမျိုးများ၏ ရိုးရာ အသုံးအဆောင်ပစ္စည်းများသဖွယ် ပြသထားမှုများကို ရုပ်သိမ်းဖယ်ရှားပေးရန် နှင့် နာဂဒေသနှင့် နာဂလူမျိုးများအား အခြားလူမျိုးနှင့် ဒေသအောက်သို့ ထည့်သွင်း သုံးနှုန်း ဖော်ပြပြောဆိုခြင်း မပြုကြရန် တောင်းဆိုခြင်းတို့ဖြစ်သည်။
နာဂ တိုင်းရင်းသားသည် သီးခြားမျိုးနွယ်စု ဖြစ်ကြောင်းကို လွှတ်တော်နှင့် ၀န်ကြီးဋ္ဌာနများသိရှိနိုင်ရန် ဆောင်ရွက်ပေးရန် နန်းယွန်း၊ ခန္တီးနှင့် လေရှီးမဲဆန္ဒနယ်တို့မှ ပြည်သူ့လွှတ်တော်ကိုယ်စားလှယ် ၃ ဦးတို့က ပြည်သူ့လွှတ်တော်ဥက္ကဋ္ဌထံသို့ မတ်လ ၅ ရက်နေ့တွင်လည်း စာရေးသားတောင်းဆိုခဲ့ကြသည်။
နာဂ တိုင်းရင်းသားမျိုးနွယ်စုများသည် တိဘက်ကုန်းမြေမြင့်မှဆင်းသက်လာသော မွန်ဂိုလွိုက်မျိုးနွယ်စုတွင် ပါဝင်ကာ ရေကြည်ရာ မြက်နုရာ ပြောင်းရွှေ့နေထိုင်ခဲ့ပြီး ယခုအခါ
စစ်ကိုင်းတိုင်းဒေသကြီးအတွင်း လေရှီးမြို့နယ်၊ လဟယ်မြို့နယ်၊ နန်းယွန်းမြို့နယ်၊ ခန္တီးမြို့နယ်၊ ဟုမ္မလင်းမြို့နယ်၊ တမူးမြို့နယ်တို့တွင်လည်းကောင်း၊ ကချင်ပြည်နယ် ရှင်ဗွေရန်မြို့နယ်ခွဲ၊ တနိုင်းမြို့နယ်၊ မြစ်ကြီးနားမြို့နယ်တို့တွင်လည်းကောင်း၊ အိန္ဒိယနိုင်ငံ နာဂလန်းပြည်နယ်၊ မဏိပူရပြည်နယ်၊ အာသံပြည်နယ်နှင့် အာရူနာချယ် ပရာဒေ့ရ်ှပြည်နယ်တို့တွင် တဆက်တစပ်နေထိုင်သော လူမျိုးနွယ်စု ဖြစ်ကြောင်း နာဂတိုင်းရင်းသားအဖွဲ့များက ဆိုသည်။
မြန်မာနိုင်ငံတွင် အဓိက လူမျိုးစု ၈ ခု ဖြစ်သော ကချင်၊ ကယား၊ ကရင်၊ ချင်း၊ ဗမာ၊ မွန်၊ ရခိုင်၊ ရှမ်း ရှိပြီး ကချင်မျိုးနွယ်စု ၁၂ စု၊ ကယားမျိုးနွယ်စု ၉ ခု၊ ကရင်မျိုးနွယ်စု ၁၁ စု၊ ချင်းမျိုးနွယ်စု ၅၃ စု၊ ဗမာမျိုးနွယ်စု ၉ စု၊ မွန်မျိုးနွယ်စု ၁ စု၊ ရခိုင်မျိုးနွယ်စု ၇ စု၊ ရှမ်းမျိုးနွယ်စု ၃၃ စု၊ စုစုပေါင်း ၁၃၅ မျိုး ရှိကြောင်း လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဋ္ဌာန ဒု ၀န်ကြီး ဦးဝင်းမြင့်က လွှတ်တော်သို့ ပြောကြားခဲ့သည်။
No comments:
Post a Comment