ပဋိပက္ခများကြောင့် ငပလီ ခရီးသွား လုပ်ငန်းတွင် ဂယက်ရိုက်မှုရှိ

ပဋိပက္ခများကြောင့် ငပလီ ခရီးသွား လုပ်ငန်းတွင် ဂယက်ရိုက်မှုရှိ

မြတ်စုမွန်| March 30, 2013 | Hits:6,975 

ရခိုင်ပြည်နယ် သံတွဲမြို့ရှိ ငပလီ ကမ်းခြေ (ဓာတ်ပုံ – မြတ်စုမွန်)

မြန်မာပြည် အလယ်ပိုင်းတွင် ဖြစ်ပွားသည့် ပဋိပက္ခများကြောင့် ခရီးသွားလာမှု သတိပြုရန် အမေရိကန် သံရုံးက ၎င်းတို့၏ နိုင်ငံသားများကို သတိပေးစာ ထုတ်ပြန်လိုက်ပြီးနောက်ပိုင်း ရခိုင်ပြည်နယ် သံတွဲမြို့ရှိ ငပလီကမ်းခြေသို့ အမေရိကန်နှင့် ဗြိတိန်နိုင်ငံသားများ လာရောက် လည်ပတ်မှုနှုန်း လျော့ကျသွားကြောင်း ငပလီကမ်းခြေ ဟိုတယ်ဇုန်ဥက္ကဋ္ဌက ပြောသည်။
“အမေရိကန်နဲ့ ဗြိတိန်တွေ အလာနည်းသွားပေမယ့် ကျန်တဲ့ နိုင်ငံသားတွေကတော့ ပုံမှန်ရှိပါတယ်။ အဓိကတော့ ဂျာမန် နိုင်ငံသားတွေ များတယ်” ဟု ဟိုတယ်ဇုန် ဥက္ကဋ္ဌ ဦးကျော်စွာမောင်မောင်က ဧရာဝတီသို့ ပြောသည်။
ငပလီကမ်းခြေ ဟိုတယ်ဇုန်များတွင် နိုဝင်ဘာ၊ ဒီဇင်ဘာနှင့် ဇန်န၀ါရီလများသည် ကမ္ဘာလှည့်ခရီးသွားများ အများဆုံး လာရောက်အပမ်းဖြေသည့် ကာလဖြစ်ပြီး ဖေဖော်ဝါရီ၊ မတ်နှင့် ဧပြီလများသည့် ပြည်တွင်း ဧည့်သည်များ လာရောက် လည်ပတ်လေ့ရှိသည့် ကာလများဖြစ်ကြောင်း သိရသည်။
မြန်မာပြည်အလယ်ပိုင်းနှင့် ပဲခူးတိုင်းအတွင်း ဖြစ်ပွားနေသည့် ပဋိပက္ခ ဂယက်များကြောင့် ယခုနှစ် ငပလီ ကမ်းခြေ သင်္ကြန်သို့ ဧည့်သည်ဝင်ရောက်မှုနှုန်း ကျဆင်းနိုင်ကြောင်း ဟိုတယ်နှင့် ခရီးသွား လုပ်ငန်းများနှင့် ဆက်စပ်နေသူများက ခန့်မှန်းပြောဆိုသည်။